政情：陳仲尼年結：生意似過山車
臨近年尾，又係回顧過去一年工作嘅時候。早幾日我哋見到從事投資生意嘅考評局委員會主席陳仲尼（Rock），講起佢公司過去一年業績，佢就感慨話可以用「坐過山車」嚟形容。事關上半年生意不錯，直到四、五月時以為今年可以大豐收，點知到六月嘅Ａ股股災及八月人民幣貶值都影響好大，可謂始料不及。
歐洲買酒店 料五年回本
Rock話，由於佢公司持有不少人民幣點心債券，由上半年有利潤，到下半年變成「摸和」，只好寄望明年市道有好轉，再覓商機。對於明年市道，佢話會保持觀望態度，因為除咗美國有機會再加息外，內地經濟亦有放緩迹象，預計香港樓市亦將有下調趨勢，認為投資要謹慎。不過，佢對於投資歐洲酒店則頗樂觀，早前於歐洲購入一間酒店，估計五年可以歸本。
今個聖誕節，Rock就同家人去加拿大滑雪，回港後將着手籌備浙江同鄉會於明年四月舉辦嘅美麗浙江節，推廣浙江特產及美食如金華火腿等，若反應好，希望以後每年舉辦一次。