政情：黃進達慰妻 再諗遊韓大計
康泰旅行社董事總經理黃進達（Jason）早前當選成為新一任旅遊業議會主席，之後仲做埋爸爸，雖然嚟緊一年工作將會好忙碌，但佢知道太太佗Ｂ佗咗咁多個月相當辛苦，所以計劃明年四月左右，等太太坐完月之後，就會陪太太去韓國歎番幾日慰勞吓喎。如果去得成，Jason一年內足足去咗四次韓國。
新沙士前後已三赴當地
Jason笑言，太太好鍾意韓風，而佢間中都會煲吓韓劇，順便了解吓最近韓風興啲乜，因為做旅遊業唔可以同潮流脫節喎。佢又話，一年會飛東南亞國家好多次，好似韓國咁，南韓爆發新沙士前後已經去咗當地三次，嚟緊同太太將會去第四次喇。
至於未來一年嘅旅遊業發展，Jason知道明年將會有更多大型郵輪在港停泊，預計會帶來過萬旅客人次，但同時佢哋亦要諗辦法處理有關人潮及重塑香港旅遊嘅吸引力。此外，近期相繼有多間郵輪公司來港設立辦事處，顯示郵輪公司重視在港未來發展。