中環出更：業界改造廚具 美貌智能並重
市面上各類產品推陳出新，就連日用品都講科技潮流，好似近年興起色彩繽紛嘅煮食鍋，就算唔常用都可以當做擺設。香港出口商會早前舉行鑽禧午宴，卓妮見到生產廚具為主嘅商會理事孫榮聰（Eric）及弟弟孫榮良，佢哋話現時廚具除咗功能實用之外，用家對食具外觀亦非常講究，靚嘅廚具甚至變成一種潮物，唔少人爭相去買齊一套。
講起未來廚具嘅趨勢，當然係要靚同有設計感，好似佢哋最近就生產緊一批有特別花紋嘅廚具。不過，Eric話智能化亦係非常重要，例如可以透過手機應用程式提示用家幾時夠鐘熄火等功能，煲水及煮嘢都唔使驚煮過龍，關鍵時刻可以發揮重要作用。
積木贈兒 丁天立也愛砌
當日出席嘅仲有理事顏志永、陳稼晉、香港優質標誌局主席丁煒章及香港工業設計師協會主席楊兆航等。
楊兆航話，近年唔少玩具都同手機應用程式相連，例如以程式遙控機械人或玩具車等，因此小朋友玩手機並不一定會影響購買玩具嘅意欲，而唔少玩具公司亦會與時下動畫或電影製作公司合作，食正每一期電影潮，好多玩具因此變成一種收藏品。
至於商會會長丁天立（Ivan）就有爸爸丁午壽出席捧場，佢哋家族經營玩具製造生意，尤以玩具火車等模型為王牌，因此Ivan童年時家中好多玩具火車玩，雖然話依家啲小朋友大多玩手機及平板電腦，但Ivan話都會不時買玩具畀個仔，好似積木咁，佢話就算個仔唔玩，佢都會砌嚟玩吓，乘機當買埋畀自己喎。
卓妮