一個原本莊嚴的議事堂「立法會」，主要職能係制訂、修改和廢除法律；審核及通過財政預算、撥款、對政府嘅工作提出質詢等，可如今拉布成災、流會成慣例、點人數小學雞……真係睇到市民把鬼火！
呢，聖誕節未到，立法會已經休會，版權修訂條例在一片嘈吵中暫時休兵，曾鈺成主席一臉無奈，既自嘲又痛苦咁話：最少有兩個星期唔使再聽到「催魂鐘」喎！
對曾主席嘅無奈和「千年一嘆」深表同情，皆因老朽「為人師表」時，校長特別關照一班「學習差異」大的「融合」班我歎，一班三十五人，六個自閉，七個過度活躍症，三兩個正常，其餘無心向學，老朽每入課室就如困獸鬥，好似玩扑傻瓜咁，呢頭叫大牛「安靜」，一嘢撳低佢，叫佢坐低，呢頭大鵬又展翅高飛，滿課室奔跑嘻嘩，老朽狂呼：你哋靜啲啦，校長巡堂啦！班嘩鬼睬你都傻，明知巡堂係巡你個「老而不」，關我鬼事！教室如此兇險，老朽一聽聞「催魂鐘」──上課鐘聲，個心就離一離，成個人落晒形！為兩餐，點都要頂住份「神聖教職」！曾主席嘅「催魂鐘」，勾起老朽之傷心往事也！
講真，拉布唔止導致議會空轉，施政受阻，更搞到成個香港永無寧日。香港之所以發展停滯，班尸位素餐嘅議員難辭其咎，香港未來繼續沉淪，真係多得佢哋唔少！
做高官嘅又一味「官到無求膽自大」，做尊貴議員又得三招：拉布、流會、掟嘢，香港唔死，真係搵鬼信咯！不少反對派議員患了「天生臭臉綜合症」，即一副「全世界都欠我錢」的表情，無端會散發不爽、急躁等情緒，讓人誤以為他們真踩了狗屎。
唉，如此議員，大事做不了，小事做不好，難怪曾主席都因可暫時遠離「催魂鐘」而稍感安慰！