政情：公民講場：基金陰謀論 家強鬧多餘

政府前日宣布撥出近二千二百億元儲備成立「未來基金」，進行回報率較高嘅長線投資，但有人質疑基金嘅真正目的，係唔畀特首梁振英（CY）亂使錢。財經事務及庫務局局長陳家強尋日出席電台節目時，就直斥有關陰謀論係多餘同無厘頭！查實未來基金之所以會出現，主因係財政司司長曾俊華（鬍鬚曾）連年估錯數，令政府累積數千億元計嘅額外盈餘，形成政治壓力逼佢每年派糖排洪，基金嘅真正作用係幫鬍鬚曾收埋部分「不義之財」，減輕佢每年制訂預算案時嘅派糖壓力。將事件扭曲為針對CY，真係幾多餘同無厘頭嘅！