政情：「老樹盤根」屋邨辦事處
盤據東區漁灣邨逾廿年嘅民建聯雙料議員鍾樹根，喺今次區議會換屆選舉中老貓燒鬚，輸咗畀提名期最後一日先報名參選嘅「傘兵」徐子見。樹根並未氣餒，早前表明喺邊度跌低，就會喺邊度企番起身，據知佢將會用立法會議員名義續租漁灣邨嘅議員辦事處，避免舖位落入徐子見手中，睇嚟樹根已經準備好四年後收復失地喎。
不過，根據房委會指引，最優先租用公共屋邨單位作議員辦事處嘅應該係區議員，其次先係地區直選嘅立法會議員及功能界別議員，所以樹根想霸住個舖位都無得霸，唔知徐子見知唔知自己有優先使用權呢？除咗續租辦事處，聽講樹根喺今個月底會搞一場大型蛇齋餅糉活動，相信係為咗反擊早前網民拉隊到場慶祝佢落選嘅派對，唔知網民到時又會否發起去踩場呢？