高鐵工程超支及延誤爭議停不了，各界都關注會唔會爛尾，質疑政府監察夠唔夠，適逢立法會人事編制小組委員會尋日開會，討論開設一個職位監察港鐵完成高鐵工程。立法會議員蔣麗芸（Ann）批評，高鐵工地工程緩慢，佢日日都會去望個工地，覺得好似停咗工咁。嘩，唔通阿Ann做埋路政署嗰份，走去監察高鐵工程？
阿Ann話，佢住喺高鐵工地隔籬，每朝都會去睇吓個工地，耐唔耐又會影吓相，覺得張張相都係一樣，好似冇乜人開工，質疑署方每個月只落一次工地監察係咪足夠。佢要求當局將監督人員嘅辦事處，搬到高鐵地盤，並保證高鐵工程不會延期等，否則唔會投贊成票。
呢個講法隨即被各方質疑，委員會主席葉劉淑儀就問，局方係咪同意有關工作人員搬到蔣麗芸樓下，路政署署長劉家強回應話，負責監督嘅專責小組要負責多個工地，包括米埔。
阿Ann又再急急發言，指專責小組都可以設喺米埔。劉家強就強調，呢啲職員要做協調工作，放喺單一工地未必係最好嘅安排。講真嗰句，雖然阿Ann日日去望個高鐵工程，但相信只在外圍望入去，但內籠同地底工程有冇進展，佢真係望得到？