鄭Sir着警入屋尋汽水作餌
【本報訊】「貴州幫」三刀匪闖西貢獨立屋綁劫後四散逃遁，其中一對賊兄弟，細佬「阿發」慌不擇路，逃至仁義路及大網仔路交界的山邊護土牆，被追至警員前後包抄，進退失據下急跳牆，跳上一棵離地約六米高大樹，包圍的警員大為緊張，一度警告「唔好走呀，再走開槍！」惟「阿發」受驚愈爬愈高，與警對峙險象環生。在場的黃大仙警區署理助理指揮官（刑事）總督察鄭嘉俊一直勸說他返回地面，期間「阿發」突然以唔鹹唔淡的廣東話稱「我要汽水！」鄭Sir即抓緊機會，打蛇隨棍上稱「我點樣攞畀你呀你咁高」，眼見「阿發」攬實的幼枝隨時折斷，鄭Sir好言提醒「你可唔可以坐番埋啲呀，你嗰度好危險！」
「周圍都係差人 你走唔到」
「阿發」其後顯得不耐煩，再次大呼「我要汽水呀！」鄭Sir安撫謂「我應承得你就有o架喇，你放心！」並指「呢度周圍都係差人，你點走到啫？」「有幾大件事呀？使唔使搵命博！」警員其後在遇劫獨立屋找來一罐可樂，鄭Sir展示汽水讓「阿發」看見，又稱「呢度最大我(口架)喇！我話應承畀你飲就畀你飲啦，你落嚟啦！」對峙片刻後，「阿發」疑難抵口渴，見到鄭Sir手持的汽水後態度軟化，最後「三扒兩撥」爬返地面被捕，被警員帶走時仍邊行邊飲汽水。
