政情：學會60周年 全城「築」賀
建築師學會會長吳永順（Vincent）早前出席一個活動時透露，學會明年將會踏入六十周年，已經諗定多項大計，首先明年上半年舉行周年建築獎及建築展覽，回顧香港六十年來舉世矚目嘅建築物。明年九月就舉行亞洲建築師論壇，屆時將邀請十九個國家代表來港。此外，仲會舉行電車遊，讓市民一邊搭電車，一邊由建築師做導賞員介紹沿途建築物嘅故事，務求令市民更了解建築藝術。
其實咁多項慶祝活動，都屬於Vincent今年上任時講過嘅任內三大任務宗旨，包括推動創意建築、為建築師發聲以及令青年睇到希望。建築係一門藝術，唔少建築師都鍾意作畫或攝影，Vincent亦打算明年底舉辦建築師藝術作品展，希望展現建築師嘅另一面喎。搞咁多嘢，無疑可以省靚建築師學會個招牌，但使錢就唔少得，唔知Vincent需唔需要籌定款呢？