中環出更：大病初愈 黃宜弘豪飲不戒口
立法會議員尋日同一眾前任議員午宴，唔少往日時常出現喺立法會嘅臉孔，包括呂明華、鍾沛林、何世柱、楊孝華等等，一共十六名前議員重現議事堂，真係星光熠熠，期間仲大飲茅台同紅酒添！有靚酒飲，又點少得外號「立法會酒仙」嘅前議員黃宜弘（Philip）呢？雖然佢啱啱先做完肺癌手術，但依然完全冇戒口，不斷飲酒，並自爆一做手術就望住啲靚女護士。大病初愈都唔肯戒酒戒色，唔知黃太梁鳳儀（Anita）知道後，會唔會扭佢耳仔呢？
卓妮十月嗰陣，仲見到Philip要坐住架電動三輪車代步。尋日喺立法會見番佢，已經係健步如飛、龍精虎猛，完全唔似啱啱戰勝癌魔。佢自爆喺午宴上飲咗廿五杯茅台，果然係立法會酒仙！
Philip仲透露，自己做完手術之後，當日傍晚已經可以即刻落床，第一件事係飲番杯威士忌，仲大讚病房啲護士好靚添，認真大膽，唔通唔怕老婆Anita鬧？
原來Anita都不知幾緊張佢，Philip表示，太太逼佢食好多中藥補身，又冬蟲草、又靈芝等，但佢就自覺復原得好好，唔想食中藥，仲話肺有事同飲酒無關，所以會繼續飲喎。想當年Philip仲喺立法會時，就算要開會都唔會戒酒，試過飲到滿面通紅喺會議廳瞓着覺，睇嚟酒永遠係佢生命嘅一部分。
現任議員單仲偕都飲咗十杯茅台，又同Philip老友鬼鬼攬住影相。而單仲偕嘅民主黨黨友、離開立法會後轉做公關工作嘅李華明（阿Fred）亦有出席，但係冇透露飲咗幾多杯。
劉秀成疑酒後吐真言
前建築界議員劉秀成亦疑似酒後吐真言，大爆現任建築界議員謝偉銓有意連任。對於區議會選舉有多名資深議員落選，劉秀成話，阿Fred亦有同佢講，話依家從政過咗六十歲就會畀人嫌棄，但佢就覺得五、六十歲嘅人係最有經驗，由佢哋做議員對個社會係好事喎。
卓妮