政情：創科局長首赴大會捱質
創新及科技局局長楊偉雄尋日首次以局長身份出席立法會大會接受口頭質詢，雖然佢一開始就「賣口乖」，希望大家原諒佢講嘢唔清楚，但仍遭到議員連番狙擊。
其中社民連梁國雄（長毛）「考起」楊偉雄，問佢有否考慮使用迪士尼樂園隔籬一幅六十公頃嘅土地作為數據中心，但楊回應話唔夠資料作答，長毛就話自己出任局長更為適合。
議員劉慧卿就質疑由楊偉雄擔任顧問嘅創新及科技諮詢委員會代表性不足，會否考慮重組委員會，以增加代表性。點知楊偉雄竟然帶卿姐「遊花園」，話聽取意見不限於委員會，後來卿姐再追問下，佢先至話暫時唔會有大重組喎。資訊科技界議員莫乃光就認為楊偉雄首次到立法會，表現算係不過不失，其他議員亦算對佢客氣，又建議楊作答時精簡啲。