政情：象哥幫EQ做宣傳大使
民建聯立法會、區議會「雙料議員」葛珮帆（EQ）喺區議會選舉中落敗，更被黨友黃定光（象哥）寸佢掛住去非洲保護大象，「救到我（象哥）但救唔到自己」，意指EQ只顧外遊而無時間爭取區內選票。EQ尋日喺立法會支持一個反對買賣象牙貿易嘅示威，並於大會提出一項加強打擊走私野生動物嘅動議。被問到象哥對佢嘅批評時，EQ即時黑面，但之後又戲劇性搵到象哥幫佢宣傳保護大象。
拎「剝牙死象」圖疑補鑊
世界自然基金會等環保團體尋日喺立法會示威，促請政府禁止象牙貿易，又高叫「沒有買賣，就沒有殺害」，署理環境局局長陸恭蕙亦有出席，而EQ就同大象公仔合照。問EQ點睇象哥對佢嘅批評，點知一提到「象哥」二字，EQ面色一沉，話唔會回應，亦唔想再提，然後轉身離開。之後再追問佢同象哥有冇再傾呢件事，佢就話象哥只係講笑，又話唔希望區選話題延續落去。
不過，EQ事後就向外發放一幅立法會黨友為佢打氣兼幫手宣傳嘅合照，當中最矚目就係象哥企喺EQ隔籬，象哥仲要拎住一幅大型嘅「剝牙死象」圖片，認真大吉利是，莫非係補鑊之作？