中環出更：王國強讀博士 苦功不「菲」
國力書院博士學位風波爆出後，發現不少政商界人士都有有關菲律賓大學的博士學位，部分更急急澄清自己是真才實學。卓妮日前在一個教育活動上見到廣東社團總會前主席王國強（KK），記得佢去年重返校園修讀香港理工大學商業管理博士，唔知讀成點呢？KK一輪嘴細數讀書有幾認真、辛苦，仲抽水講笑話：「唔係菲律賓四個月（就攞到學位）嗰啲！」認真搞笑。
KK啱啱同十個同學去咗瑞士玩五日，呢趟係學校規定要去嘅，上堂五日等於喺香港返學四個月。吓？咁濃縮速成，不免令人同最近「博士工廠」事件產生聯想喎！KK都覺得有啲唔對路，即笑笑口劃清界線，仲話已經返學返足四十五個星期六，即將近一年，所以佢係「嚟真嘅」。
鄧楊詠曼撐家鄉學府
仁愛堂前主席鄧楊詠曼（Sophia）及蔡黃玲玲早前兩人分別捐助五百萬元人民幣畀上海華東師範大學（華師大），校方特登來港舉行捐贈儀式，唔少城中名人去捧場，除咗KK之外，仲有連續多年帶港生返內地交流嘅全國青聯常委姚祖輝、香港加拿大國際學校創辦人李君豪，仲有現身同校方簽署戰略合作協議嘅新華集團董事蔡雋思，佢話將在一帶一路沿線國家推廣華文及儒家思想。
Sophia已在內地捐助七間大學，佢話華師大係培養優質老師嘅學府，又位於佢家鄉，梗要支持啦。蔡黃玲玲就話，教育好重要，所以多年前已捐助仁愛堂成立教育基金，帶學生到極地探險。今次佢同Sophia一齊做善事，冀為培育下一代盡一分力。
卓妮