政情：「阿婆」唔精神 講錯「李」職銜
外號「民主阿婆」嘅前政務司司長陳方安生連日趕場，尋日出席香港大學畢業生議會特別會議時，唔知係咪攰得滯，個腦唔清唔楚。佢炮轟政府拖延任命校務委員會主席時開口夾着脷，竟然話校委會成員李國章曾任中文大學校董同埋校監喎，但事實上李國章從來都冇以非校長身份做過中大校董。至於校監就仲好笑，全港八大院校嘅校監不嬲都係特首喇！
民主阿婆話，根據李國章最近嘅言行，同埋以往同大學嘅關係，都係「不親善」，佢仲特別提及李國章當年喺做中大校長嘅風波，不過就口快快亂咁噏，將李國章當年個職位講錯，仲要連錯兩次。佢先係講咗中大校董，之後再次提及時就改口話中大校監。佢仲一路都冇意識自己講錯咗，唔通真係攰得滯搞到亂晒大龍？