老嫩兩輩互指摘
民記對外解釋冠冕堂皇，話今次區選完成咗新舊交替，老將落敗就總結為輕敵及疏忽。不過，聽聞民記喺選舉翌日召開中委檢討賽果，黨友之間就互相指摘同推卸責任，真係人前人後兩個樣。
唔知係咪見到今屆出現好多年輕面孔，有人喺會上抱怨部分議員年紀太大所以輸，有年長議員就反駁唔關年紀事，更指自己獲得嘅選票比上屆多。
另外有人怪責，部分資歷較深嘅議員覺得唔需要助選，甚至連洗樓名單都無，結果危急關頭先搵番僅有嘅名單洗樓救亡。不過，最離譜嘅係，竟然有人歸咎有選民嘅身份證畀仔女收埋。如果事件屬實，又事關重大，點解唔報警呢？