政情:苦盡未甘來 創科焗搬竇

命運坎坷嘅創新及科技局(創科局)經過三年半「拉布」,終於喺上周五正式開局,而辦公室又好唔容易先安排喺政府總部廿六樓落腳。局長楊偉雄做咗多年「低薪影子局長」後,終於可以領正牌收局長份糧。正當大家以為一切苦盡甘來之際,原來廿六樓只係臨時辦公室,櫈都未坐暖,預計半年後又要搬去二十樓嘅「終極」辦公室,創科局立局真係幾經波折,只能嘆一句:「唔夠運」!

工作排山倒海湧到

現屆政府原訂喺二○一二年開設創科局,原來當時政府已經留咗政總總部二十樓畀創科局做辦公室。點之一開始就遇到立法會「拉布」,一拉就三年半,香港寸金尺土,政府無理由好似空置校舍咁丟空寫字樓,於是用嚟做創新科技署及政府資訊科技總監辦公室。如今創科局「出世」,搬番二十樓統領大局,可說係順理成章,但二十樓暫時未有空間,所以要裝修「執一執位」,明年中先搬到落去。

創科局認真係「奔波命」,唔單止要搬竇,工作亦排山倒海湧到,之前商務及經濟發展局局長蘇錦樑已經暗示,創意香港及知識產權署稍後亦可能撥歸創科局,原來發展局推行嘅九龍東「聰明城市」,都可能會過畀創科局處理。

有知情人士指,現時由發展局負責將九龍東作為「聰明城市」嘅試點,但係軟件硬件都涉及唔少技術考慮,發展局未必識得處理,所以好可能交由創科局負責。此外,楊偉雄上任時講過,會研究推動以創新科技服務長者及弱勢社群等,預計呢啲政策亦可能要同食物及衞生局、勞工及福利局合作,睇嚟創科局要不斷接手其他政策局有關高科技嘅項目。

至於楊偉雄上任時提到,希望建設香港成為連通的WiFi城市,據了解,顧慮到由政府起基建成本太高,加上科技日新月異,如果經常更新,涉及好多資源,又未必追得切,局方主張唔會自己起WiFi基建,反而會以類似招標方式,租用現時電訊業界嘅WiFi設施,相信可以更快提高政府免費WiFi覆蓋率,為業界提供商機之餘,相對亦平得多。

第一手消息請下載on.cc東網iPhone/iPad/Android/Windows Phone Apps