中環出更：區選夫妻檔 「齊人」夢難圓
歷屆區議會選舉，都不乏夫妻檔和父子或父女檔齊齊出選，但每次都有人歡喜有人愁，未能如願齊齊當選，當中以民主黨李永達與陳樹英這對夫婦最為經典，李永達在四年前於葵青區議會荔華區選落敗，到今屆區選，太太陳樹英亦步佢後塵，得票低於建制派對手，突然失去屯門區議會兆康選區議席。
民建聯（民記）亦有同一家庭參加區選，有得亦有失，好似今屆自動當選嘅北區區議員劉國勳，上屆以四千七百多票成為「票王」，可惜其妻呂廸明連續兩屆參選均落敗。此外，由一九九一年當選至今嘅資深屯門區議員陳雲生，今屆「老貓燒鬚」敗給工黨副主席譚駿賢，相反其妻龍瑞卿則順利自動當選屯門區議員。
梁偉文三口家僅一當選
同樣係民記嘅梁偉文，連任多屆葵青區議員，今屆再度與女兒梁嘉銘父女兵上陣，再加上「八十後」初上陣的兒子梁崗銘，一家三口一同出戰葵青區，成為地區一時佳話。不過，最終三個只能活一個，當中只有梁偉文成功連任。梁嘉銘繼○七和一一年區選後，於今次區選再次與議席擦身而過，睇嚟都係冇選舉運。
卓妮