香港運動員唔係垃圾！「風之后」李麗珊當年嘅名句一再得到證實，至今依然擲地有聲，尤其係最近，香港運動員屢創佳績，揚威國際，何止唔係垃圾，直頭係英雄添吖！
嗱，保齡球運動員胡兆康日前第四度出征保齡球世界盃，力壓群雄，勇奪桂冠，唔止個人運動生涯登上高峰，更加成為史上首位喺呢項最高級別賽事奪標嘅香港球手。最難得嘅係，胡兆康百折不撓，即使經歷喪父同癌症等打擊，依然能夠憑住堅強鬥志，衝破逆境，為自己人生打贏一場最漂亮嘅勝仗。
同樣令人眼前一亮嘅仲有羽毛球新星伍家朗，喺香港羽毛球公開賽中，呢位港隊年輕代表愈戰愈勇，先後擊敗中國名將林丹同台北一哥周天成，成功進身四強，創下港隊男單喺呢項賽事嘅歷來最佳成績。
係人都知，港府話就話支持體育發展，可惜口惠實不至，體育政策固然欠奉，對體育運動嘅資助更加少得可憐，搞到運動員好似孤兒仔咁，自生自滅。喺咁嘅環境下，香港體壇依然人才輩出，屢創佳績，可以話係難能可貴。冇誇張（口架），由昔日嘅李麗珊、黃金寶到今日嘅胡兆康、伍家朗，由單車新星李慧詩、黃蘊瑤到乒乓孖寶李靜、高禮澤，香港運動員都係靠自己雙手闖天下，用血淚同汗水寫下佳績，佢哋嘅成功正正係獅子山精神嘅最佳體現。
唔係吹水（口架），胡兆康締造保齡球壇神話之後，體育界人士感慨良多，話康仔拎咗世界盃冠軍獎座，等於成功保住保齡球精英項目資格，令全港球員唔使為保分費神，可以全力備戰亞運同其他大賽。你話嘞，港府資助體育運動好似層壓式推銷咁，運動員淨係「跑分」都疲於奔命，仲點樣集中精神比賽吖。當然喇，港府投資體育孤孤寒寒，但係虛榮心就一啲都唔少，平日對運動員不聞不問，當運動員揚威國際就爭住抽水，簡直醜態百出。
所以話，香港人成日話要重拾獅子山精神，運動員逆境自強咪就係最佳榜樣囉。可惜嘅係，隨着社會風氣變遷，呢股精神近年已經愈離愈遠咯，今日嘅香港紛紛擾擾，內鬥內耗，有啲人唔係自強不息，而係怨天尤人，連一場香港隊對中國隊嘅足球賽都高度政治化，搞到滿城風雨，仲講乜嘢體育精神？仲講乜嘢再創輝煌吖？
都係嗰句喇，福無私與皆天賜，禍不空生自有招。香港運動員唔係垃圾，香港人亦唔係臘鴨，如果大家能夠發揮獅子山精神，學運動員自強不息，香港就唔使淪落到咁嘅地步喇，係咪！