政情：公民講場：TSA當檢查 亂噏吳得掂

全港系統性評估（TSA）衍生出來嘅操練文化備受爭議，唔少關注團體先後表態要求取消TSA，搞到外號「吳得掂」嘅教育局局長吳克儉最近頻頻出來撲火。吳得掂尋日又發表「為TSA去蕪存菁」為題嘅網誌，並以定期身體檢查作比喻，指父母會透過定期體檢跟進子女嘅健康及成長狀況，得知問題後及早診治，而唔會事先催谷子女身體以求過關。吳得掂一直話TSA唔會影響學生升學及作為殺校指標，但依家又話學生體檢後有問題就要及早診治，即係要TSA唔達標嘅學生要及早「診治」啦，所以家長有乜辦法唔事先催谷子女呢？