政情：今日你上鏡：中環遭「捕獲」 林瑞麟口密

前政務司司長林瑞麟自從一二年退出官場後，一直保持低調，之前去咗英國牛津大學讀一年神學，近年亦好少喺公開場合見到佢。不過，尋日我哋就咁啱喺中環上海總會見到林瑞麟同一位友人食飯，一邊食一邊密斟。我哋就趁佢離開嗰陣上前諗住傾幾句，但佢就唔想多講，亦唔肯透露飯敍朋友係咩人，只係笑住咁急步離開，直至人群中消失。正所謂「不在其位，不謀其政」，林瑞麟就真係做到，唔會好似部分人咁離任後仲對政事指指點點。