政情：鏞記故人遺願償 葉澍堃欣慰
終審庭前日推翻原訟庭及上訴庭判決，下令將鏞記集團母公司清盤，唔少名人食客得知事件後均各有感慨。其中馬會大董葉澍堃（Stephen）與甘健成生前非常老友，佢對裁決感到欣慰，認為故友嘅心願最終達成，事件亦叫做告一段落。佢又話，創辦人甘穗煇離世後，兩個兒子經營得不錯，仲曾經獲得米芝蓮一星，相信無一個港人會諗到老店鏞記有清盤嘅一日，最理想係能夠繼續打拚落去。
常客林健鋒最愛燒鵝瀨
立法會議員林健鋒（Jeffrey）亦係鏞記老食客之一，佢話自甘穗煇年代已經有幫襯，最愛該店嘅燒鵝瀨、雲吞麵及皮蛋酸薑等食物，大大小小嘅菜式均相當出色，有時佢亦會宴請朋友一齊去食。佢話一間有七十年歷史嘅老店就此唔做相當可惜，因為除咗本地人喜愛之外，喺海外亦好出名，好多外國朋友來到香港，都會主動叫佢帶路去試一試。