曾幾何時，香港「購物天堂」同「美食天堂」聞名於世，可惜時移世易，隨着旅遊醜聞不斷，「購物天堂」已名存實亡，只有「美食天堂」招牌暫時仲保得住，總算可以聊以自慰。
係咁嘅，國際餐飲美食指標《米芝蓮指南香港澳門2016》日前公布結果，二十多間本地街頭小食店榜上有名，當中不乏港人熟悉嘅平民美食，包括家傳三代嘅滷味店、老牌豆品廠及傳統糕餅店，仲有新興甜品店等，可以話係各適其適，應有盡有。正如米芝蓮負責人話齋，街頭小食係香港本土生活一部分，亦係香港嘅特色，所以咯喎，全球只有香港及澳門版將街頭小食納入指南中，都算係難得咯。
冇錯嘞，本土特色美食一向深受老外歡迎，當年末代港督肥彭食勻港九新界，唔係食蛋撻就係食乳鴿，或者飲涼茶，除咗做騷扮親民，更因為食指動而忍唔到口。話時話，米芝蓮近年推介嘅本港食肆愈來愈多元化，愈來愈平民化，除咗今次呢廿幾間小店，傳統粵菜以至街邊雲吞麵舖亦受到青睞。
所以話，有麝自然香，特色美食揚威海外，證明只要有實力、有吸引力，始終會獲得認同。財政司司長曾俊華早排口口聲聲要引入外國嘅「美食車」概念，本來無可厚非，香港係中西薈萃嘅地方，多啲選擇係一件好事，弊在佢一味崇洋，強調美食車以售賣熱狗薯條為主，牛雜雞蛋仔等土炮免問，你話係咪捨近求遠吖？係咪有眼不識美食吖？
其實，美食車仲係吹水階段，十畫未有一撇，家陣最大問題係點樣將本土特色美食發揚光大。米芝蓮食肆負責人擔心傳統技藝後繼無人，亦有人擔心業主見獵心喜，瘋狂加租。唔係杞人憂天架，人怕出名豬怕肥，近年就有米芝蓮食肆因為捱唔起貴租而被迫執笠。好似銅鑼灣一間逾五十年歷史、《花樣年華》等多部著名電影取景嘅扒房咁吖，就算歷史悠久，遠近馳名，一樣不敵租魔而關門大吉，問你點頂！
見微知著，傳統老店嘅苦況，正正係各行各業經營困難嘅縮影。大家有眼見，今時今日營商環境惡劣，傳統小店買少見少，上海街嘅婚嫁用品店、上環摩羅街嘅古董店等等，好多做唔住而黯然離場，講到底，咪就係高地價、高樓價、高租金嘅「三高」政策作怪囉。
所以話，香港一日地產獨大，大家都冇運行，特色平民食肆執吓一間又一間，莫講話遊客冇癮，遲早連港人都冇啖好食嘅咋！