政情：今日你上鏡：校長快閃

中大尋日搞咗個「環校慈善跑」為無國界醫生籌款。開幕禮上，當一眾同學仍未起步，校長沈祖堯就偷步一馬當先拔足疾走，但佢唔係參與慈善跑，而係雞咁腳離開趕住出席另一間學校嘅畢業禮啫！點解沈祖堯咁都要到一到呢？皆因佢好認同無國界醫生嘅義舉，兼且佢嘅同學區耀佳醫生及中大公共衞生學院教授陳英凝都係呢個組織嘅中堅分子，因此幾忙都要抽時間現身撐場。沈祖堯話，遺憾未能陪同學一齊跑，但佢每朝七點都會喺中大校園跑步，只要同學唔好晏起床，就好有機會撞見佢跑步喎。