政情：流會解讀 難破懸案
立法會大會前日流會，係今個立法年度首次流會，事後個個流會「元兇」諸多藉口，企圖推卸責任。面對立法會形象大插水，政界近兩日流傳多個消息，矛頭直指建制派有意藉流會向泛民主派「拉布」議員施壓，亦有傳流會係自由黨與經民聯之間嘅恩怨情仇總爆發，甚至指建制派唔想辯論《防止賄賂條例》動議。當然個個都否認呢啲傳聞，而流會已成懸案，就算偵探福爾摩斯都未必能夠搵出真相。
當日立法會大會辯論《防止賄賂條例》部分條文涵蓋特首嘅動議，點知社民連「長毛」梁國雄上午近十一時忽然點人數，最終會議只得三十四人出席，有三十五人缺席，欠一人在場而流會收場。
自由黨經民聯牙齒印深
政界內就流傳三種分析，首先多個主流建制黨派，好似民建聯、工聯會、經民聯都有超過一半議員在席，一班建制派議員近日都大打開口牌，對部分激進泛民議員透過響鐘點算開會人數深感憤怒，不少議員寧願遲至十四分鐘先現身會議廳湊夠人數。若真的不幸流會，就可以好似前日嘅情況，大條道理將責任推畀激進泛民、甚至主流泛民，再次強化泛民與「拉布」嘅關係，呢個分析尚算正路。
第二個解讀就係缺席嘅建制派二十人之中，以比例計，就以自由黨缺席率最高，五個議員得一位在席，缺席率達八成。值得注意嘅係，流會前係由內務委員會主席、經民聯梁君彥擔任代主席。政壇廣為人知，自由黨與經民聯多年來牙齒印甚深，有指梁君彥見其他建制黨派夠人，就無急召其他議員歸位，寧願流會，令自由黨成為流會元兇。不過，梁君彥就否認傳聞，指可以出席會議嘅建制派議員，都已經出席。
建制不欲就《防賄例》表態
至於第三個解讀，就係建制派唔希望提早就《防止賄賂條例》部分條文涵蓋特首方面表態，否決或棄權嘅話，都會被泛民抹黑，擔心影響區議會選情，所以寧願流會。不過，有建制派指出，下個星期先辯論《防止賄賂條例》，時間上更接近選舉，對他們影響更大。上述三種分析，大家會相信邊種呢？冇諗到一次流會，就引來多番揣測，或者箇中原因好簡單，就係議員「闊佬懶理」。