中環出更：政壇驚現變種亞視黨徽

由兩名民主黨前成員狄志遠及黃成智成立嘅政黨新思維，號稱行非泛民及非建制嘅第三條道路。新思維成立咗一段時間，但黨徽尋日先面世，而且與不獲續牌嘅亞視台徽十分相似，可以講係變種亞視台徽。不過，如果好似亞視一樣面臨停播，就認真「唔老利」喇！

新思維嘅黨徽以藍色和綠色為主，並由兩條弧線交叉而成。狄志遠指，為免黨徽被二次創作，所以要清楚向大家解說，兩條高低起伏嘅弧線代表兩種思路和意見，兩條各走極端嘅線最終相遇代表和而不同、求同存異。佢又透露，創作者係一名九十後嘅年輕人，佢稱呼對方為A小姐，感謝對方免費設計咗呢個黨徽。

新思維將於明年一月舉辦第一屆會員大會及籌款晚會。狄志遠稱，佢哋嘅目標係籌得三百多萬元運作費用，現時僅籌得一百多萬元。

雖然與目標仍有一段距離，但佢有信心可以達到目標。佢又強調，該黨唔會接受來歷不明及具爭議性嘅捐款，唔想因捐款而引發政治風波，由於現時仍未開始公開募捐，所以暫時只有相熟人士捐款。

卓妮