中環出更:議員試新椅 唔夠力扮鎮定

創新科技嘉年華日前開幕,一班政商界中人四圍參觀,睇吓有咩新奇發明。卓妮見工程界立法會議員盧偉國對其中一張可以高低移動嘅座椅非常有興趣,原來只要坐喺張座椅上「印」吓「印」吓,就可以發電。盧偉國仲笑言,如果立法會換晒呢啲櫈,日後就算有議員玩「拉布」,佢哋都可以坐喺度發電,叫做有啲作為喎。

當日嘉年華吸引唔少學生到場,當盧偉國研究緊張發電座椅點用時,有個小學生就向佢教路話:「咁細力唔得o架,要大力啲」,相當搞笑。理大電機工程學系教授鄭家偉就解釋,其實張櫈係用於汽車,視乎唔同路面嘅凹凸情況而產生唔同程度電力,例如普通公路上駕駛一小時,可產生約五百火電力,用作減低電動車嘅充電次數,或用於普通車輛內嘅音響等用途。

另一議員葛珮帆(EQ)就對一張可以上落樓梯嘅「必飛越障椅」好欣賞,仲坐埋上去試添!話說呢張輪椅生產首二十張已經立即售罄,皆因佢可以上落唔同大小、高度及材質嘅樓梯,仲好穩陣,EQ坐咗上去並向上移動幾級之後,發明者李少麟喺佢身後用力踢咗張輪椅幾腳,EQ都唔跌落嚟,但見到EQ個樣就淆晒底,強顏歡笑扮鎮定。

劉展灝睇中「自潔布料」

同場仲有生產力促進局主席劉展灝,雖然今次嘉年華無展出同佢生意相關嘅鐘錶新科技,但就有好多佢都未見過嘅工業產品,好似「自清潔處理布料」,對於多應酬飯局嘅人就啱晒,萬一唔小心滴咗啲紅酒、豉油落件衫度都唔使怕,因為呢隻新物料經陽光照射四至六小時後,就會自動分解污漬。咁唔知男士們恤衫上嘅唇膏印又能否自動分解呢?

卓妮

第一手消息請下載on.cc東網iPhone/iPad/Android/Windows Phone Apps