政情：張雲正「花心」 冧爆公務員
上咗任冇幾耐嘅公務員事務局局長張雲正（Clement），係罕有仲未結婚嘅局長，尋日佢首次以局長身份，頒發嘉許狀畀公務員，當然要幫一眾剩女問吓佢有冇拍緊拖啦！唔知係咪怕醜，佢就哈哈大笑話呢樣唔答喇，但透露有好多個心上人，唔通呢個鑽石王老五咁花心？佢解釋，媽咪係其中一個，而且所有公務員都係心上人，認真識冧班公務員喎！
Clement仲話，公務員喺薪酬同福利方面比起私人及公營機構嘅彈性較少，明年會將嘉許狀嘅名額由八十個增加至一百個，係對辛勞工作嘅同事給予最低限度嘅認同。至於同樣上任冇耐嘅公務員事務局常任秘書長周達明（Thomas），否認早前有人搵過佢做局長，話自己「何德何能」，大讚Clement講嘢好叻，又習慣面對傳媒，好適合做局長喎。