曾幾何時，香港係遠近馳名嘅亞洲足球王國，賽事蓬勃，有聲有色，可惜時移勢易，家陣香港足球水準固然每況愈下，連售票都倒瀉籮蟹，都唔知好笑定好嬲。
係咁嘅，香港足球隊將於今個月十七日喺旺角大球場迎戰國家隊，競逐世界盃外圍賽出線資格，尋日發售門票，吸引大批球迷爭購，唔少人甚至通宵排隊添。點知由於座位有限，門票轉眼售罄，大批向隅嘅球迷不忿鼓譟，有人拒絕離開，有人嘗試衝閘，場面混亂，充滿火藥味。
現場售票七國咁亂，網上購票一樣烏龍百出。因為購票人數眾多，售票系統出現大塞車，長時間處於「系統繁忙」狀態，被網民洗版鬧爆。喺一票難求之下，想現場觀戰嘅球迷奇招盡出，有人號召比賽當日到旺角場外爬樹睇波，有人喺網上討論區成立「港中大戰波飛緊急協調中心」，都咪話唔誇張。
講真，世界盃外圍賽萬眾矚目，中港對決更被視為世紀大戰，受到球迷追捧係意料中事，弊在旺角場只得幾千個座位，僧多粥少，想唔爭崩頭都幾難。係呢，點解唔開放可以容納更多觀眾嘅香港大球場？當局係咁講嘅，大球瑒啱啱舉辦過亞洲七人欖球賽，草地短期內難復原喎。其實正如有人質疑，除咗球場質素問題，當局根本就係擔心大球場太多人會引發混亂，難以控制啫。可惜吖，人算不如天算，即使改喺旺角場比賽，一樣引發唔少亂象，球賽未開波，售票已經引起怨聲載道。
講起就丟架，香港作為堂堂國際都會，連搵個似樣啲嘅球場作賽都咁艱難，仲話發展足球運動喎，講出嚟都笑死人。冇錯，香港足球喺七、八十年代的確輝煌一時，當年人才輩出，戰績彪炳，屢次喺亞洲大賽揚威，八六年世界盃外圍賽更加喺北京工人體育場力壓主場國家隊，締造本港足球史上經典一幕。只可惜，隨着歲月流逝，今時唔同往日咯。難為前特首曾蔭權爵士豪言壯語振興港足，仲推出「鳳凰計劃」添，點知港足唔止冇飛上枝頭變鳳凰，反而因為醜聞多多而臭名遠揚。
一葉知秋，本地足運一沉不起，正正係香港由盛而衰嘅縮影。香港自己唔爭氣，不思進取不特止，近年仲陷入政治泥沼不能自拔，內鬥不休，連舉辦一場世界盃外圍賽都搞到如臨大敵，仲講乜嘢壯大發展吖。今日嘅香港就好似一支走下坡嘅球隊，由無能港府做領隊，想唔降班都幾難。
無論點都好，體育歸體育，政治歸政治，球迷入場係為咗欣賞賽事，唔係搞政治，如果再重演噓國歌嘅鬧劇，盞搞死香港嘅咋！