政情：今日你上鏡：變身主席人選 楊紫芝唔知

香港大學校務委員會主席一職未知花落誰家，早幾日我哋就遇到被指係熱門人選之一嘅新任港大校務委員兼港大醫學院榮休教授楊紫芝，當時係晚上十點半鐘，佢喺港鐵灣仔向堅尼地城方向嘅月台上車，一入車廂就即刻有人讓座畀佢。細問之下，原來佢啱啱去完朋友嘅生日派對，所以攞住一紮黃色嘅花，正在返屋企途中。對於被傳係港大校委會主席人選之一，楊紫芝就話：「係咩？有啲咁嘅事咩？我都唔知呀，我都係睇傳媒報道先知咋！」之後列車抵達中環站，楊紫芝就落車啦，臨走前仲講聲拜拜添，認真友善。