政情:TSA風波 吳得掂閃得就閃

外號「吳得掂」嘅教育局局長吳克儉,尋日出席立法會會議又遭到連環追擊。首先出招嘅係立法會教育事務委員會主席林大輝,指佢已決定喺本月廿九日、就全城熱議嘅全港性系統評估(TSA)爭議舉行公聽會,要求吳得掂親自出席聽意見。佢又直指吳得掂係唔稱職局長,如果今次處理TSA再有差池,相信會引嚟家長和學生口誅筆伐、窮追猛打。

拒有壓力下做試題

吳克儉回應指,當日佢咁啱要以私人理由離港,無法親身出席公聽會。「長毛」梁國雄立即寸佢,指如果高官可以私人理由唔開會,咁學生可否因私人理由唔做TSA?

另一議員陳家洛呼籲吳得掂唔好做鴕鳥,會後佢更加向對方下戰書,要求吳得掂試做TSA試卷。不過吳得掂就話,佢唔會喺壓力下做呢啲測試喎。唔知全港學生又可唔可以好似吳得掂咁,話因為有壓力而唔做TSA呢?

第一手消息請下載on.cc東網iPhone/iPad/Android/Windows Phone Apps