政情：馬逢國望人送中港大戰飛
世盃外圍賽中港大戰今個月十七日喺旺角大球場舉行，尋日球賽門券就喺球場同網上開始發售，但未到中午，門票已經售罄，就連體育、演藝、文化及出版界立法會議員馬逢國都撲唔到飛，仲開到口話希望有人送免費飛畀佢喎。
出動助理幫手都撲唔到
每逢撲飛日子，唔少市民都會一家大細、親朋戚友總動員出擊，馬逢國尋日都唔例外，叫咗幾個議員助理同事幫手上網買飛，順便睇吓有關網頁運作情況，可惜佢幾個同事都係一登上有關網頁，就顯示系統繁忙，結果冇人可以成功買到飛，撲飛撲得一場空。
問馬逢國究竟支持港隊多啲定係國家隊多啲，佢就答得模棱兩可，話港隊鬥志方面勁啲，但國家隊喺團隊合作方面就比較強，佢喺感情上當然希望港隊贏啦，但係喺理智上就覺得中國隊贏好啲，因為需要有強勁隊伍去同其他地區競爭喎。