政情：今日你上鏡：林亮Duck獎 膺傑出工業家

有「中國變形金剛之父」稱號嘅永和實業主席林亮昨獲香港工業總會頒發本年度「傑出工業家獎」。年屆九十一歲嘅林亮尋日現身時依然充滿活力，四圍同老友合照。佢話近兩年旗下經典黃色小膠鴨重出江湖，係為咗帶啲正能量畀大家，又指做工業嘅人特別有拚搏精神，所以只要佢一日有精力都會繼續支持投身工業嘅年輕人。憶起往日打工經歷，佢話自己任勞任怨，從未與老細計較加班及人工問題，但係到咗佢做老細時，就好明白打工仔嘅心理。有次過年前唔夠錢出糧畀員工，都堅持向朋友借，等班員工可以有錢過個開心年。