政情：半打局長冇開fb
雖然社交網站Facebook（fb）流行了多年，但政府最近先刮起一股遲來嘅fb風，好似特首梁振英（CY）、有「吳得掂」之稱嘅教育局局長吳克儉都先後開設咗個人fb帳戶。不過，部分政府高官仍然未有fb帳戶，佢哋唔開fb嘅原因大致可分兩類，包括本身政策局已有fb專頁，或是太忙無此計劃。到底真係因為上述理由，抑或係擔心受到網民攻擊，就真係局長們自己先知喇！
陳茂波議員時代曾開設
當好多人習以為常使用fb嘅時候，CY及吳得掂等最近先開設fb個人帳戶，再度引起大家關注高官用fb嘅情況。據了解，現時保安局局長黎棟國、公務員事務局局長張雲正、發展局局長陳茂波及民政事務局局長劉江華暫時未有開設個人fb帳戶，前兩者有可能因為局方涉及太多敏感資料，所以不方便使用fb。
至於陳茂波做立法會議員時已經有fb，但自從擔任局長之後就好少用，只有朋友標籤佢出席活動嘅內容；加上發展局早於一三年三月已經開設fb專頁，而且不時更新，可能因此毋須跟大隊開多個個人fb專頁。
高永文張炳良一早耍手
此外，有高官一早揚言唔會開設fb，好似食物及衞生局局長高永文、運輸及房屋局局長張炳良就因為所屬範疇太多工作，冇空閒時間打理。食衞局回應指，該局對開fb持開放態度，該局政治助理亦不時喺個人fb宣傳與所屬政策局有關嘅活動。至於運房局現時就「孭」咗幾個計時炸彈喺身，包括高鐵超支及延誤、港珠澳大橋、食水含鉛及汲水門大橋撞橋意外等，相信局長都無心情玩fb喇！
雖然吳得掂所屬嘅教育範疇最近亦問題多多，但佢依然非常淡定，仲不時於fb上載個人嘅近況。其實有部分官員係因為局方無fb專頁，所以先要自己開一個，但佢哋都樂在其中，好似財政司司長曾俊華、商務及經濟發展局局長蘇錦樑都係活躍分子。講到底，fb只係一個接觸各界人士嘅媒體，唔使用fb仲有好多選擇，夠膽落區接觸市民相信更吸引媒體報道及於社交網站轉載。