難民問題成炸彈 點止租霸咁簡單

係人都知，來港提出酷刑聲請嘅所謂難民九成九以上都係假難民，港府唔止中門大開，而且對佢哋照顧無微不至，包食包住唔在講，仲提供埋法律援助，每年花費公帑數以億元計，簡直係慷納稅人之慨。港府請客，公帑埋單已經唔合理，搞到香港烏煙瘴氣，市民受害更係大問題。呢，有業主今年初將位於油麻地嘅單位租畀四名南亞裔聲請人士，點知對方第二個月開始就交唔足租，之後變本加厲，半年後只收得四分之一租金，業主忍無可忍，決定收回單位。最慘係呢班難民租霸易請難送，臨搬走前將單位大肆破壞，門鎖、地板、傢俬、電器幾乎無樣完好，十足十打完仗咁。埋單計數，欠租加上重新裝修，業主最少唔見十萬元，真係無辜。

咪以為呢啲只係個別事件吖，有關注團體指出，近年經常處理類似投訴，其中油麻地同深水埗嘅劏房單位更加係重災區，當業主追究時，難民租霸已經逃去無蹤。其實正如法律界人士話齋，租客破壞物業係刑事毀壞，弊在警方往往大事化小，當作租務糾紛處理，業主求助無門，都咪話唔閉翳。

話時話，假難民搞到香港七國咁亂，雞毛鴨血，又點止租霸問題咁簡單吖。大家有眼見，聲請人士龍蛇混雜，打黑工者固然好普遍，作奸犯科者更加大不乏人，姦淫擄掠、黃賭毒黑……各適其適，無奇不有。早排之嘛，兩班南亞裔人光天化日之下喺港鐵站劈友，其中唔少就係有案底嘅聲請人士。淨係一個蘭桂坊咋，今年上半年因涉毒而被捕嘅疑犯之中，聲請人士就佔咗七成，好地地一個旅遊景點淪為「人間妖域」，咪就係呢班假難民好帶挈囉。

正所謂，自作孽，不可活。假難民問題尾大不掉，完全係港府一手造成。雖然當局聲稱會加快難民身份甄別程序，可惜得個講字，積壓嘅聲請個案不減反增，至今已經衝破一萬大關。功夫茶諗極都唔明，家陣連口口聲聲高舉人權嘅歐美國家都大幅收緊難民政策，好似英國咁，偷渡客一旦證實係假難民，會被即時停發生活津貼，亦唔准留喺英國上訴，點解港產官僚唔參考吓人哋嘅經驗呢？

始終都係嗰句，當斷不斷，必受其亂。今日香港紛紛擾擾，已經夠晒亂，港府繼續效婦人之仁，對難民問題呢個計時炸彈無動於衷，盞激發更大民怨，唔衰攞嚟衰嘅咋！