政情:彭耀佳嗜紅酒:平嘢有好

香港唔少人都鍾意飲紅酒,香港總商會主席彭耀佳都係紅酒愛好者,佢話最鍾意法國同澳洲產地,大讚澳洲酒價格唔高但品質好,佢揀紅酒仲研究埋酒莊同葡萄品種,認真講究。佢話以前喺英國讀大學時,已經開始飲紅酒,做學生當然冇錢買貴酒啦,但都有唔少選擇,後來出來工作之後,不時同歐洲人傾生意,為咗了解外國文化,就更加畀心機去了解多啲紅酒,正如外國人都會多啲了解中國文化一樣。

講咗咁耐,到底邊隻紅酒先夠好飲呢?彭耀佳話,如果一般食飯,二、三百元嘅紅酒已經好好,如果請客,六百至八百元嘅亦都好見得人。佢又話,同一支酒,喺餐廳買通常會貴五、六成,就好似可樂喺餐廳隨時要二十幾元一罐咁,所以如果只係自己閒時飲吓紅酒,去超市買就平好多喇!

第一手消息請下載on.cc東網iPhone/iPad/Android/Windows Phone Apps