政情：香港無寧 華哥睇好澳門
近年香港政治爭拗不絕，嚇怕唔少投資者。原本考慮將總部由倫敦遷回香港嘅滙控，都傳出有股東對香港嘅政治化環境感到擔憂而反對。天寶鐘表主席梁青華（華哥）都有同感，佢寧願過澳門一口氣開三間分店，都暫唔考慮再喺香港「落重注」。
避政治爭拗 過大海開舖
華哥自立門戶後，早前喺尖沙咀開首間分店，但佢睇好澳門冇政治爭拗，所以趁月底澳門一個毗鄰橫琴口岸嘅綜合度假村開幕，於是決定一次過開三間唔同國際品牌嘅分店，希望喺經濟寒冬中做出一番成績。佢仲話，如果香港再嘈嘈吵吵落去，遲早冇運行喎。
啱啱取得加拿大會計師牌照嘅華哥細仔梁仲康，今年八月啱啱由加拿大返港幫手，但覺得有啲唔慣，講緊嘅唔係政治環境，而係又濕又熱嘅天氣喎！