中環出更：手臂印圖騰 卿姐水洗唔清
立法會議員劉慧卿尋日下午返立法會開會，卓妮就見到佢雙手前臂都有彩色圖案，唔通卿姐咁潮走去紋身？原來佢上周六去咗西貢出席全城街馬慈善山野賽開幕禮，大會人員就用印水紙喺佢雙手前臂上印咗個大會圖騰，貪靚嘅卿姐當時已問定個圖騰幾耐先會褪色，得到答案係話第二日就會甩晒色，但點知洗極都洗唔甩。
卿姐話，唔知點解洗極都洗唔甩個圖騰，已經隔咗成個星期，圖騰仲清晰可見。佢就呻話，最慘係近期天氣仲熱熱哋，着短袖衫出席會議時，如果露出個圖騰又好似唔係咁好，搞到佢焗住要着長袖衫去遮住個圖騰。卿姐仲話，好彩冇將個圖騰印喺塊面度咋！其實坊間都有唔少清洗印水紙圖案嘅方法，包括用洗甲水清洗等，卿姐不妨可以參考吓。
卓妮