中環出更：嫁女抱孫 黃士心喜上加喜
前晚快活谷有夜馬賽事，卓妮見康泰旅行社創辦人黃士心（Jackie）現身撐愛駒，睇嚟心情唔錯。佢自爆十二月份屋企雙喜臨門，除咗兒子黃進達（Jason）太太即將分娩，佢升呢做爺爺之外，Jackie嘅廿八歲愛女亦即將結婚，未來女婿來自醫生世家，Jackie對呢門親事都覺得好滿意。咁啱十二月底旅遊業議會改選，若被視為主席大熱人選嘅Jason順利當選，咁咪喜上加喜？
潘偉業鄺晶晶將再弄瓦
Jackie讚Jason好乖仔，自稱冇逼阿仔及新抱添孫，但係咁快黃家有得開枝散葉，梗係開心晒。依家囡囡仲搵到好歸宿，佢放晒心喇！有添B之喜嘅仲有做威發國際執董潘偉業（Albert）及太太鄺晶晶（Akiko）。已育有一名一歲半囡囡嘅Akiko話，呢胎都係女，佢鍾意女仔多啲，所以好開心。不過，佢笑住「投訴」話，早前幫腹中BB照4D動態立體超聲波，結果細女同家姐一樣似足Albert，唔似佢喎。
度身訂造服裝品牌詩閣董事總經理張德祥同太太范元芳、兒子張宗豪（Lincoln）及姪仔張宗琪（Tony）都有入場湊熱鬧，Tony仲着上自家設計嘅中西合璧外套現身，好有型。Lincoln話，五年前佢嘅大仔出世時，專登為囝囝訂做BB衫及口水肩，仲繡埋名，自此就為添丁嘅朋友製作貼心賀禮，個個都好鍾意。一旦時機成熟，佢打算推出呢個尊貴BB衫系列喎，咁Jason就快啲排定隊喇！
卓妮