香港駐海外經濟貿易辦事處、駐內地及台灣辦事處官員每年只返港一次向立法會匯報工作報告，而每年報告又千篇一律，但今年報告竟因為佔領行動而有「新意」。香港駐美國總經濟貿易專員梁卓文尋日出席工商事務委員會時話，當地人只能夠透過傳媒理解，但報道又不夠全面，報道佔領行動時又選擇精要畫面，會令到外國人以為香港好亂，所以佢要深入淺出咁講解政改問題，更要傳達香港無因為佔領行動而搞到經濟差嘅訊息。
駐歐盟專員林雪麗亦發表相近言論，佢仲話要連《基本法》、人大決定講起，仲引述歐盟五月發表嘅報告，指一國兩制喺香港運作良好添。另外，駐京辦主任傅小慧稱會與內地朋友解釋，行動非廣大市民認同，而商界亦反感。佢話過去一年曾舉辦活動，吸引內地民眾參與，透過當地傳媒宣傳香港喺好客城市。睇嚟佔領行動後期，駐外辦事處人員的工作相當充實喎。