香港地少人多，居住密度之高一向喺全球數一數二，但其實幾百萬人只係逼住喺三分之一嘅土地上，實際上擠迫程度仲高。不過，政府搵地難，開發新市鎮阻力大，早前有人建議透過發展現有已開發土地，唔使開發新市鎮。發展局局長陳茂波尋日出席活動時感嘆話，現時本地人口密度達每平方公里二點七萬人，已相當於孟加拉首都達卡及印度城市孟買，所以進一步挖地方發展房屋不可行。咁又係，香港人均居民收入逾四萬美元，屬富裕社會，但居住質素竟然同第三世界國家差唔多，唔通香港人真係窮到只剩下錢？
