政情：鬍鬚曾搵耶倫擋箭
盛傳有機會喺下屆特首選舉「陪跑」嘅財政司司長曾俊華（鬍鬚曾），為求上位頻頻大搞形象工程，點知早前玩出禍，忽然提出敏感嘅樓市措施「減辣」論，不但令特首梁振英三度澄清政府唔會「減辣」，更有傳北京擔心鬍鬚曾係地產商隻棋，「陪跑」機會迅即幻滅。未知鬍鬚曾是否為求「翻盤」，尋日喺秘魯利馬出席世界銀行年會時，竟然借美國聯儲局主席耶倫過橋，為自己嘅「減辣」言論補鑊。
明知故犯 禍從口出
正於秘魯利馬參加國際貨幣基金組織和世界銀行年會嘅鬍鬚曾，同銀行組織與會代表會面，其中與美國聯儲局主席耶倫會面時，雙方除討論美國貨幣政策對主要新興市場嘅影響及全球經濟展望外，佢仲喺未會面前率先於網誌透露，會把握機會當面問耶倫有關美國嘅加息步伐。不過，大家唔好天真以為鬍鬚曾關心市民擔心會受「息魔」殺到而困擾，其實係為咗自己利益至真。
鬍鬚曾話，知道耶倫一定唔會答佢心目中想知道嘅答案，情況就好似記者不時會問他，幾時調整針對樓市嘅措施，而佢多年來都只能引用「標準答案」，否則一旦改口風，隨時會被市場過分解讀，甚至造成不必要嘅震盪，所以即使會令記者失望，亦只能做個「人肉錄音機」，重複標準答案。既然鬍鬚曾知道「一旦改口風」會造成社會震盪，點解仲要冒險講「減辣」呢？結果言論隨即被炒作，搞出個大頭佛。
被指欲討好地產商
現時樓市只係有零星樓價回落個案，鬍鬚曾就急不及待話要考慮「減辣」，即係想托市唔畀樓價下跌啦，難怪被指係想討好地產商喇！再者，所謂嘅「標準答案」，同美國喊加息一樣已變成「狼來了」，等同廢話，相信連耶倫自己都未必知道幾時可以加息，最終鬍鬚曾亦只係得到一個「標準答案」，如此問來作用何在呢？相信唯一作用就係為自己嘅「減辣」言論死撐兼補鑊喇！