中環出更：名人同「台」祝酒 講玩講食
好多港人都同台灣有淵源，尋日有台灣駐港機構舉辦雙十節酒會，唔少同台灣友好嘅人士都有出席。其中康泰旅行社董事總經理黃進達（Jason）笑言，旅遊業界人士同邊個國家或地區都好有淵源，又指無論男女老幼都鍾意去台灣玩，相信未來去台灣旅遊嘅港人有增無減，旅行社亦會發掘多啲新景點迎合需求。
Jason話，台灣受旅客歡迎，價錢係其中一個重要因素，當地無論飲食同住宿的價錢都好抵，分分鐘新台幣仲好用過人民幣添。佢又話，台南小食都好吸引，好似魚丸、魚湯、滷肉飯等，甚至形容當地係小食嘅鼻祖。除咗台南，近年台東都開始多人去，加上唔使靠捷運，使費自然少好多，預計可以吸引到唔少年輕人。
工業界立法會議員林大輝就話，佢喺八、九十年代同台灣有生意來往，當時台灣紡織業發展好蓬勃，人造纖維、棉花等原材料都要由當地入口。不過，近年台灣同香港一樣，都要面對地價同人工高嘅問題，而越南、柬埔寨的成本相對較低，所以唔少廠家都搬咗過去，台灣就專注發展高科技行業。
郭位高標準收台生
同場嘅城市大學校長郭位都話，該校係全港首間招收台灣學生嘅大學，雖然現時該校嘅台灣學生唔係最多，但有信心收生標準係最高。卓妮仲見到勞聯立法會議員潘兆平，佢話今屆立法會去到最後一個會期，希望可以把握時間為勞工議題發聲，尤其係標準工時、取消強積金對沖機制等熱門議題，令到更多工人權益得到保障。
卓妮