波哥話，自從上星期五獲建制派明確支持後，佢就陸續拜會泛民尋求支持，仲同人民力量議員陳偉業（大舊）及梁國雄傾過創科局，又透過泛民會議召集人何秀蘭約緊佢哋開會，希望喺各方同意之下解決呢件事。雖然人力提出大量動議，但佢話百幾條暫時都可以處理，希望今個月內就可完成審議。
大舊揚言又拉布
主理科技政策嘅商務及經濟發展局局長蘇錦樑（Greg蘇）呢兩日密密見泛民，尋日見咗民主黨主席劉慧卿，今日就會見大舊。卿姐話仍未解決疑慮，今日黨團將開會決定立場。
大舊就不滿政府仍未回應點樣將研究同生產結合，若冇令人滿意嘅答案就會「拉布」阻止通過。不過佢都估計頂多拉到四次會喎！