建制派前日就釋放善意話，唔會霸晒所有立法會委員會正副主席，會讓出福利同衞生事務委員會兩個主席予泛民。尋日輪到泛民開會，泛民會議召集人何秀蘭表明唔會接受相關建議。佢話，希望建制派尊重傳統，按兩大陣營議席嘅比例分配主席。民建聯葉國謙就老實唔客氣咁話，全面競爭係屬必然之事，睇嚟雙方開戰在所難免。
何秀蘭話，現時泛民喺議會中佔三分一議席，理應喺掌財權嘅工務、人事及財委會中，至少有一個主席位，若只得福利及衞生兩委員會主席，泛民嘅主席人數就被壓到不足一成，咁做無異於趕盡殺絕。泛民亦決定派民主黨劉慧卿競逐財委會主席，民主黨單仲偕爭取內會主席。若果二人角逐主席失敗，會再選相關委員會副主席，至於其他委員會人選就未作出決定。
劉慧卿預計最終泛民一個主席都選唔到，但希望社會能見到建制派猙獰面目。佢又批評建制派對泛民候選人篩選係具侮辱性，不滿建制對候選人「評頭品足」。