政情：鬍鬚曾 亂噏減辣 搬石揼腳
財政司司長曾俊華（鬍鬚曾）做財爺愈做愈過癮，外界仲一度傳出佢可能有機會喺下屆特首選舉中陪跑。鬍鬚曾又好勤力寫網誌，似係鋪路進行形象工程。不過近日最近佢嘅有意「減辣」言論，可以話係自己搬石仔揼自己腳，唔止畀特首梁振英（CY）三度反駁，更令政圈懷疑鬍鬚曾係想討好地產商。不過市民對樓價高企怨氣沖天，鬍鬚曾仲講減辣，到時就算想陪跑，都冇民意支持喇！
被CY狠狠摑咗一巴
CY政府上任之後，為咗穩定不斷飆升嘅樓價，推出咗壓抑樓價嘅「雙辣招」，無奈樓價愈升愈有。正當近排樓價開始見到下跌趨勢時，鬍鬚曾突然話，因為外圍環境波動，及本港樓宇供應增加等因素，樓價可能會有所調整，政府會特別留意發展，仲揚言有需要嘅話，會考慮喺政策上作調整咁話。佢嘅言論一出，就令外界聯想到政府係唔係會開始「減辣」。而CY之後就喺出席行政會議時澄清，就三度強調政府唔會「減辣」，可以話係狠狠咁摑咗鬍鬚曾一巴。
怕做咗地產商隻棋
其實喺握手事件之後，政圈一直有傳鬍鬚曾可能二○一七年有望上位，可以躋身下屆特首選舉當中。而鬍鬚曾唔止頻頻更新社交網站，上載睇拳賽、睇波、以及同年輕人、小朋友合照等照片「呃like」，疑似進行形象工程外，亦都多次喺佢嘅網誌度落力宣傳「一帶一路」，一副配合國家發展嘅模樣。鬍鬚曾嘅舉動難免令人覺得佢正積極謀求上位，不過當鬍鬚曾搶閘講「減辣」，聞說佢陪跑機會立即幻滅，點解？傳聞話因為北京擔心佢做咗地產商隻棋喎。
言論同小市民對着幹
香港依家樓價高企，小市民置業艱難，政府喺解決房屋問題方面又苦無寸進。鬍鬚曾依家仲話要「減辣」，豈不是等同同廣大上車無望、捱緊貴租嘅市民對着幹？佢亂講減辣，係將石頭搬嚟揼自己隻腳呀。