中環出更：星級退休生活
香港人愈嚟愈長壽，退休之後做乜嘢過日辰好呢？早前卓妮見到即將退休嘅荃灣區議會主席陳耀星笑笑口話，已經諗定退休除咗入馬場支持愛駒之外，要靠「三打一游」消磨時光喎！即係乜？原來「三打」係打高爾夫球、打太極同埋打麻雀，至於「一游」就係游水。陳耀星仲話，做運動夠晒健康，有益身心，手腳同腦部輪流做運動，實唔怕悶。
見佢講退休生活講得咁開心，但係日前有調查話，超過五成香港人對生活感到不快樂，葵青區議會主席方平就認為，原因同依家社會太多爭拗不無關係。好似早前港鐵拒絕攜帶大型樂器乘客坐港鐵一事咁，最初可能只係個別職員嘅判斷或決定錯誤，最終搞到咁大件事。啲小事積埋積埋，咪會導致心情受影響囉！
經常好似開心果咁嘅民政事務局前常任秘書長「媽打」李麗娟就畀啲開心貼士大家，佢話只要每日多思考同珍惜自己擁有嘅嘢，心情就自然會靚啲，所以佢近年瞓身支持慈善活動，皆因助人為快樂之本。至於類似開唔開心嘅調查只係參考，唔一定準確，所以毋須太在意喎！
董吳玲玲有孫萬事足
「翡翠王后」香港善德基金會主席董吳玲玲亦經常笑容滿面，當日見佢同一對孫仔孫女一齊，唔使問都知有孫萬事足，梗開心晒！董太話暑假期間因為基金會事務太忙，無時間同家人去旅行，所以上星期偷閒同子女乖孫出埠旅行。叉飽電，又要瞓身籌備下月一日舉行嘅善德重頭活動遠足百萬行喇！
卓妮