政情：二度告別議會 嫻姐玩低調
今屆立法會仲有一年先換屆，但陸續已有多名資深議員表明不連任，其中早於九五年已當選前立法局議員嘅工聯會陳婉嫻（嫻姐），亦喺尋日變相宣布第二度告別議會，仲低調到佢本人都冇現身。
直言係時候交棒
工聯會尋日公布今屆區議會選舉參選名單，嫻姐一如所料不在名單之上，其原有選區由黨友頂上參選，意味佢不會再循「超級區議會」界別角逐連任立法會。嫻姐其實早喺○八年首度告別立法會，之後一二年政改方案通過，立法會新增五個「超級」議席，嫻姐喺工聯會游說下復出，最終成功當選首屆「超級」議員。可惜佢今年初因協助「懷仔」申請居港權備受抨擊，為長達三十年嘅從政生涯留下少許遺憾。
工聯會指嫻姐去咗美國探親旅遊，因此冇出席尋日嘅活動解答記者問題。不過我哋打電話畀嫻姐，就發現佢已經返咗香港。佢直言當年復出，主要係迎戰「超級區議會」呢個新挑戰，依家係時候交棒。