政情：今日你上鏡：龐卓欣成專資會「集郵」對象

啱啱出爐嘅港姐亞軍龐卓欣（Ada）日前同爸爸龐寶林及姑姐龐愛蘭出席專資會周年晚宴，Ada隨即成為一眾成員「集郵」對象，個個爭住同佢合照。當晚Ada表演唱歌，龐愛蘭就大爆一段趣聞。話說有次佢哋一齊去酒店食自助餐，Ada聽到附近傳出鋼琴聲，突然興致大發想唱番兩首，龐愛蘭梗係力撐年輕人勇於嘗試，難得姪女唔怕尷尬，所以佢即刻同經理講掂數，畀姪女過吓公開表演癮，留下難忘回憶。