激流飛濺三千丈，水波蕩漾似汪洋。嗱，講緊嘅唔係瀑布，亦唔係巨型滑水梯，而係黃大仙嘅水浸，一啲都唔好玩o架。
天有不測之風雲，尋日一場突如其來嘅黃雨，搞到香港七國咁亂，其中黃大仙彩虹道一帶更加淪為澤國，成條馬路變咗深水急流，汽車受困，交通癱瘓，司機要等候救援至可以逃出生天，簡直好似災難片一樣。除咗路面水浸，商舖亦被波及，店主紛紛落閘避禍，都咪話唔閉翳。
睇到此情此景，只有四個字可以形容：匪夷所思。堂堂國際都會，面對一場黃雨就不堪一擊，好彩今次雨勢唔係持續好耐啫，如果時間長啲或者係黑雨，咪死得人多？
彩虹道變彩虹河，當局賴係啟德河正進行改善工程，影響排洪能力喎。嗱，就算係咁，都唔可以原諒。正如工程界人士指出，渠道工程一般有後備方案防止水浸，家陣搞到成個澤國咁，擺明就係當局失職喇。
唔係講笑o架，香港話就話係先進城市，其實防洪設施可能連第三世界都不如，甚至曾搞出人命添。幾年前之嘛，一場黑雨搞到全港倒瀉籮蟹，水浸及山泥傾瀉報告不斷，大埔碗窰沙埔仔村淪為重災區，滿目瘡痍，斷水斷電，兩名村民更加死於洪水之下，講起都可悲。每次發生嚴重水浸事故，當局都話會吸取教訓，改善設施，但係次次都係大隻講，講咗當做咗，過後就關人個關，今次彩虹道變彩虹河就係證明喇。
冇計喇，港產官僚敷衍塞責，吹水就叻，解決水浸問題唔使旨意。大家有眼睇，大澳長期飽受洪水蹂躪，年年淪為名副其實嘅「水鄉」，居民要求起條防波堤阻止海水倒灌，咁簡單嘅事，當局都拖足幾年至動工，港產官僚究竟有冇做好自己份工，畫公仔唔使畫出腸喇。
一滴水看世界，一場黃雨就睇到港府幾咁無能。試諗吓，連小小黃雨都搞到七國咁亂，點樣管治好香港呢？唔怪得港珠澳大橋爆出咁多醜聞，更唔怪得鉛水風波搞到一發不可收拾喇。講到底，水浸、基建、食水安全等問題多多，表面係個別事件，其實係一脈相承，港產官僚尸位素餐，施政甩漏，唔出事至奇吖。
話時話，路政署署長劉家強未上任前，做過兩年渠務署署長，當年仲要為碗窰沙埔仔村水浸奪命慘劇向村民致歉添，家陣港珠澳大橋又出事，彩虹道又水浸，呢筆帳又點計呢？
點講都好，香港作為國際金融中心，連水浸都搞唔掂，簡直係港府嘅恥辱。古人話，未雨綢繆，風季已經打到嚟，港產官僚如果唔盡快改善渠道，遲早水浸眼眉嘅咋！