佔領行動明日就踏入一周年，但因佔中而引發嘅拆大台文化同學生會退聯潮，至今仍沒完沒了。早前先進行過退聯公投嘅城大，近日又進行倒閣公投，最終喺高達八成半贊成下，壓倒性通過要現任學生會內閣「蔚城」倒台，為城大學生會成立三十年來首次倒閣。
今次倒閣公投，其實正係上次退聯公投嘅餘波。當時反對退聯嘅「蔚城」內閣，被指打壓城大退聯關注組嘅宣傳拉票工作，但同時又容許學聯前副秘書長岑敖暉等非城大學生進入校園拉票，到點票時更發生有選票被潑墨汁而作廢事件。退聯公投最終獲大比數通過，但又有前學生會幹事作出投訴，令公投結果遲遲未獲確認，激發支持退聯及不滿學生會做法嘅學生發動倒閣。
「蔚城」任期原定去到十二月底，今次倒閣成功後，城大學生可再自行籌組內閣，獲學生會評議會通過後就成為「臨時行政委員會」，維持學生會嘅日常運作。